Ég og fjölskyldan mín

Ég og fjölskyldan mín
	Ég er fædd á Fæðingarheimili Reykjavíkur á vígsludegi þess þann 4. október 1960, dóttir Stefáns Jóhannssonar, fjölskylduráðgjafa og Sveinsínu (Sísí) Tryggvadóttur, ráðgjafa. Ég er miðjubarnið Lára systir er eldri og Jói bró (Jóhann Gunnar) er yngri.
	Frumburðurinn Marteinn Örn er fæddur 10. desember 1979. Hann er tónlistarmaður enda hefur tónlistin átt hann frá því að mamma söng fyrir hann Alparós. Sænska hljómsveitin Europe heltók hann um miðjan níunda áratuginn og nokkrum árum seinna var Jackson aðalidolið. Í dag semur hann sína eigin tónlist sem á sjaldnast mikið skylt við þessar fyrri hetjur. Marteinn er tölvunörd og býr nú í Vancouver, Kanada þar sem hann útskrifaðist úr 3D Animation & Visual Effects frá Vancouver Film School í maí 2009. Hans heittelskaða Guðlaug stundar nám í leiklist við Vancouver Film School.
	Prinsessan Katrín Ýr sem er fædd 30. september 1981, byrjaði í tónlistinni er Marteinn kenndi henni Gamla Nóa þegar hún var 18 mánaða. Allar götur síðan hefur hún sungið linnulaust. Söngkeppni félagsmiðstöðvanna og síðan söngkeppni framhaldsskólanna var aldrei sleppt. Lætur sig hafa að söngla melódíur með mömmu en annars er R & B aðaláhugamálið ásamt söngleikjum. Katrín Ýr stundar nú söngnám í The Institute í London og stefnir að því að útskrifast í maí 2010.
	Pabbi Pabbi minn heitir Stefán Jóhannsson (1935) og er ráðgjafi með eigin stofu ásamt því að reka Ráðgjafaskólann. Pabbi er sonur Jóhanns Gunnars Stefánssonar (1908-2001) fyrrum framkvæmdastjóra Olíufélagsins og Láru Jóhannsdóttur húsmóður (1910-1973).
	Mamma Mamma mín hét Sveinsína Tryggvadóttir (1935-1987), hún var ætíð kölluð Sísí. Mamma starfaði sem ráðgjafi hjá SÁÁ. Mamma er dóttir Tryggva Bjarna Kristjánssonar (1900-1964) sjómanns og Magnfríðar Sigurbjarnardóttur (1907-1993).
	Lára sys Lára systir (1957) er ljósmyndari. Hún er mikil listamaður í sér hefur samið lög og texta og sögur svo lengi sem ég man. Einnig hefur hún unnið frábæra hluti í leir og gler ásamt því að taka frábærar ljósmyndir. Lára á Hildu Jönu(1976) og Gísla Tryggva(1986) og býr á Akureyri. Lára er þreföld amma, en Hilda Jana og Ingvar eiga þrjár dætur.
	Jói bró Jói bróðir, Jóhann Gunnar (1964) er framkvæmdastjóri verktakafyrirtækisins Háfells. Jói er giftur Sigrúnu Dóru(1966), Diddú sem er kennari í Lindaskóla og rekur jafnframt verslunina Nostrum ásamt fleirum. Hann á fjögur börn Davíð (1983), Stefán Gunnar (1990), Birnu Sísí (1998) og Ingu Rannveigu (2000) og varð afi í apríl 2009 er Davíð og Þóru fæddist sonur.